Saga leiklistarhópsins

Leiklistarhópur Halldóru var stofnaður í Grunnskóla Bolungarvíkur haustið 2009. Þá tóku um 30 krakkar úr grunnskólanum þátt í leiksýningu sem sýnd var í sal skólans í lok nóvember það ár. Þrír 10. bekkingar tóku að sér að halda uppi þessum hópi og setja upp brot úr Mamma mia, Ávaxtakörfunni og Söngvaseið. Eftir áramót hættu tveir umsjónarmenn og eftir var Halldóra Jónasdóttir.

Leikhópurinn hélt áfram og setti upp fyrstu leiksýninguna í nýopnuðu félagsheimili vorið 2011. Leiksýningin hét Vináttubönd og var fyrsta leikrit Halldóru. Þátttakendur voru 11 krakkar á aldrinum 7 – 14 ára.

Sumarið 2012 var ákveðið að setja upp leikrit um haustið og æfingar voru haldnar í safnaðarheimilinu í Bolungarvík. Þá voru aðeins stelpur sem tóku þátt, en þær voru frá Hnífsdal, Bolungarvík og Ísafirði. Það sumar gerði leiklistarhópurinn einnig 3 myndbönd sem birt voru á YouTube síðu hópsins. Um haustið var leikritið Danskeppnin svo sýnt í félagsheimilinu.

Leiklistarhópurinn hélt áfram að gera myndbönd og hægt er að nálgast þau flest hér, en þau eru ekki aðgengileg almenningi á YouTube þar leikararnir eru margir orðnir fullorðnir. Lykilorðið er fyrsta verks hópsins.

Halldóra flutti til Englands og seinna til Reykjavíkur en hélt áfram að gera myndbönd, bæði í Bolungarvík og Reykjavík. Árið 2014 fengu myndböndin mörg þúsund áhorf og hópurinn eignaðist marga unga aðdáendur. Árið 2016 urðu til þættirnir Ini Mini Miny Moe, sem urðu vinsælasta verkefni hópsins, fyrr og síðar.

Árið 2017 sneri Halldóra aftur heim og hélt tvö sumarnámskeið í hvítasunnukirkjunni Salem fyrir börn á grunnskólaaldri. Um haustið var settur upp söngleikurinn Matilda í þýðingu Halldóru með 27 krökkum á aldrinum 8 – 15 ára í Bolungarvík. Uppsetningin var hluti af lokaverkefni hennar í Háskóla Íslands þar sem hún stundaði nám í kennslufræðum með tónlist, leiklist og dans sem kjörsvið.

Árið 2018 var Halldóra í Reykjavík og gerði þar þrjár frumsamdar þáttaraðir með stelpum í Reykjavík. Það voru þættirnir: Vinkonur eða hvað?, Gistiklúbburinn og fyrir Kötlu. En þessir þættir voru á meðal síðustu myndbandaverkefna leiklistarhópsins þar sem hann hefur meira einbeitt sér að sviðsuppsetningum síðan árið 2019.

Árið 2019 fagnaði leiklistarhópurinn 10 ára afmæli sínu og setti því upp söngleikinn Söngvaseið af því tilefni. Í uppsetningunni tóku 31 barn þátt á aldrinum 6 – 17 ára. Sýnt var sex sinnum fyrir fullu húsi í Félagsheimilinu í Bolungarvík.

Árið 2020 var erfitt að setja upp leiksýningar þar sem árinu fylgdu samkomubönn og fjöldatakmarkanir svo námskeiðin sem voru í boði þann veturinn gengu ekki vel. Tveir hópar af sex náðu þó að klára sín verkefni og afraksturinn má finna á YouTube. Rokkskólinn og Barnaheimilið voru stuttar og breyttar útgáfur af söngleikjunum School of Rock og Annie.

Um sumarið voru haldin 7 sumarnámskeið og um haustið fór Halldóra til Englands að sækja sér meistaragráðu í Applied Theatre and Intervention frá University of Leeds. Þar samdi hún næsta verk leiklistarhópsins sem var söngleikurinn Draumastarfið. Hann var settur upp í Bolungarvík og sýndar voru 6 sýningar, þrátt fyrir samkomutakmarkanir. Söngleikurinn fjallaði um kennara sem missti starfið þar sem nemandi hennar sakaði hana um ofbeldi sem reyndist uppspuni. Kennarinn gefst þó ekki upp, fær nýjan nemendahóp sem reynist krefjandi en með þrautseigju og góðmennsku tekst henni að vinna þau á sitt band. Lokalagið í sýningunni fjallaði um Britney Spears og þegar það glumdi hæst #freebritney þá gerðist það að hún fékk sjálfræði sitt að nýju, sama dag og verkið var frumsýnt, 12. nóvember 2021. Myndin hér að ofan er hópmynd af þátttakendum Draumastarfsins. Næsta verkefni hópsins voru þættir byggðir á söngleiknum og eru þeir aðgengilegir öllum á YouTube.

Á eftir Draumastarfinu var sett upp Áfram Latibær, Vondar stelpur, Annie og Matilda. Auk þess hafa sumarnámskeiðin nú verið haldin í 10 ár og verða vinsælli með hverju árinu. Nú er einnig hægt að æfa leiklist á veturna með leiklistarhópnum og dans er í boði fyrir yngstu krakkana.